夢幻珍珠奶茶（下）
上集：https://bit.ly/34fOt8y
呢段時間，政府幾次派人抽查我嘅奶茶，懷疑我嘅奶茶裡面有毒品。
我當時嗤之以鼻，我嘅奶茶點會係毒品？毒品會傷身，奶茶唔會；毒品會令人傾家蕩產，我嘅奶茶賣四十蚊一杯。
化驗結果，係驗唔出奶茶裡面有任何毒品，或者致幻物質，所以舖頭可以繼續經營。
但依加我望住長長嘅人龍，我都幾乎懷疑，自己係賣緊毒品。
問題愈嚟愈嚴重，呢個城市內，好多公司都無法繼續營運，因為大部份員工都嚟晒排奶茶。
有人話我係惡魔，要用毒奶茶摧毀呢個城市；飲奶茶嘅人話我係天使，帶來美好嘅夢想。
我將奶茶價格調高，調到一百蚊一杯、四百蚊一杯，情況都冇改善，人龍依然增長緊，反而係搶劫案多咗。
因為人太多，輪候嘅時間漸漸增長，排幾日隊先買到一杯奶茶。
我最近返工，都覺得排隊嘅人愈嚟愈焦躁。
我開始諗，人數一直咁樣增加落去，好快就要排半個月、一個月隊先買到奶茶。
終有一日，會有人等唔到咁耐，衝入奶茶舖，將間舖同我撕成碎片。
我唔係杞人憂天，依加佢哋嘅情況真係同吸毒一樣，癮君子咩都做得出。
就算佢哋唔失控，等到呢個城市嘅大部份人，都嚟晒排奶茶，社會都冇辦法正常運作落去。
我以為，我嘅奶茶可以令大家實現夢想，但依加嘅情況，似乎係摧毀緊所有人嘅夢想。
唔可以咁樣落去，我喺完全冇預告嘅情況下，關咗間舖，逃之夭夭。
我嘅夢想，再次失敗，不過今次係我自己親手摧毀。
包括阿雲在內，好多朋友打電話畀我，問我做咩唔開舖，做咩唔沖奶茶。
我熄咗電話，不過我仲有睇新聞，我知道大家怨聲載道，好多人喺街上狂呼：「奶茶呢？我要珍珠奶茶！」
但就好似戒毒一樣，痛苦嘅階段始終會過去。
我關咗間舖幾個月後，大家嘅生活終於回復正常，我亦可以開番電話。
電話內有無數訊息，大部份都係問我點解唔再沖奶茶，唯獨係阿花，佢冇提起奶茶，剩係問我點。
你記唔記得阿花？當日我開舖前，就係搵咗阿雲同阿花嚟試奶茶。
後來阿雲上咗癮，阿花……喺我嘅記憶中，佢似乎冇嚟過買奶茶。
我打電話畀阿花，一口氣講晒我呢段時間嘅經歷。
然後我忍唔住問：「點解你冇嚟買過奶茶？」
「我本來都想幫襯你，後來見到咁多人排隊，知你唔缺生意，就無謂麻煩你。」阿花答。
我再問：「唔係呢個意思，你飲過夢想奶茶，點解你……可以抵受得住誘惑，唔嚟買奶茶？」
阿花笑一笑：「其實你都得。」
「我都得？」我唔係好明。
阿花解釋：「你第一次飲夢想奶茶，見到自己實現夢想，但你冇不斷飲奶茶啊，你都係返去現實開奶茶舖。」
又係喎，講到沉迷奶茶，我先係最容易沉迷嗰個，我明明可以自己沖，自己不斷飲，沉醉喺幻境之中。
但我第一時間諗嘅，係我可以沖到夢想奶茶，咁我一定可以開到奶茶舖。
到我關咗間舖，知道自己唔應該再沖夢想奶茶之後，我諗得最多嘅，都係第日點樣經營一間新舖。
好多人都有夢想，但有啲人永遠都唔會去行動，畀幾多動力佢，佢都只會沉醉幻境。
而有啲人每分每秒都諗緊實踐，幻境嘅誘惑只會變成動力。
我曾經以為，我嘅夢想奶茶，可以令大家有動力去實現夢想。
後來，我又以為夢想奶茶令人上癮，令人唔再想喺現實中完成夢想。
但原來，我從來都影響唔到人哋嘅夢想。
可以決定你實唔實踐夢想嘅，只有你自己。
－完－
將專頁設定為「搶先看」/ "See first"，最新故仔馬上睇！
今次到我取西經：https://goo.gl/NbLzfF
當我發現世界係一場騙局：http://bit.do/e7FTE
#短故 #短篇 #小說 #陳美濤 #廣東話 #粵語 #tomatochan #夢幻珍珠奶茶
Search